SHAQBIYYAAY SIYAASA KASAARATAT KASAARAT
OSSE WAYTEK FAYDA ORBISSEHIIY MATAAXIGA .
Jabhata shaqbiyyah abbobtiiy leh tan innih excek gexxaamahaay,
mango udduruuy isi ummattak tabba inteh cuggaane rasittet boodak
geytintamaay tamixxige.
Eretrah addal sittataay qasa badih afal baxsa luk is kee ummattah
fan aysammuk ummattal agibdinnaan im oobisakaay ummattaa kee isi
fanat kaxxa xexxar tuysubukem kee tokkel ummatta sanal gaba teetik
haakaay inti galeh tet wagittam qinbissemiiy asaaku hinna. tokkeliiy
isi ummattaa kee rasuk taturakaay cuggaane rasitte lihiiy xin
kalit kee qeebi fayxi baahakaay, cuggaane rasitte isillihiiy toysomme.
Toh inna wakaay, caanish gadiiratittel yamanallih abteh tan qeebik
gexxaamah caanish dubuh hinnay tet garit enni ta gadiiratittek
tii raaqekkah yamanah akah taceennah baadak qadli buxa teetil
madaqte.
Qagitak itiyobbiyat abteh tan qeebil seehadayti baxih rabaay
maali kasaarat dubuh hinnayaay tarasuk nawqu waynam ayro carrak
tawqu wayta saaku axcuk isyaas afwargi elle fallamitak suge difaaqitte
addagallu kuuy, inkih tanih tan eretrah xaylo edde wacarriytah
tan kasaaratah baaxo orbise.
Tahak gexakaay duma kaak intam wayteh tan galli marooy, kaa kaal
makkinnay namma rasih fanal galli marok wagari dacrissa qande
oobisak eretrah ardik 25 kiilo metri namma marih qandeh angagoyyak
currih akah gacanna madaqak tokkel wagari qande daffesse.
Isi rasuk 25 kiilo metri kabba axce waytam teetil madqaanam isih
siyaasa kasaaratay rasuu kee ummattah orbissek tiyak teena kinnim
tamixxige tah tannal anuk tohok wadir kaaduuy edde yaaban siyaasa
caddol orbisse mayso matana.mayso orbissam hinnayaay kasaaratal
kasaarat orbisakaay temeete.
Tohut inkih yabnam dude waynaamahaay, tut akak yabba inne kiiy
wagari qande angayye kalakaay mangoh tan baad baaxooxat is aysammukuuy,
illacaboh tetlih raqteh sugteh tan liibiyaay tet angaaraw kee
tetkacanuk axxeerukuuy, temeetemiiy kassinna. Tah titta fan gacissa
hayna wakaay Jabhatu shaqbiyya rasuu kee dariifah ummattak axxeerukuuy
wiilih lih gacak inkih tan ummatta isi qaduwwi abak edde gexsitak
sugte gexso elle taninnan cabba hayneh wagari qandek baxsaluk
agiddaan mari qandeh adoytit yirasuk tawqay axcuk abteh tanih
tan seecol migaaqat akak yaabak teyyeeqe marih naqabu xaamitak
ceele waytot ceele wayto osisak temeete.
Toh gita maliino kinnim akah tummuulleeh tan galli maroh saqolti
tamara tayyaaqek naharal irga tet fan ruubak axcihii galli maroh
kutbe abeenak ciggiila saqalahaa yan jan meeri giwaano miraacisa
ergat angoorowe waytem baad focal kasaarat teetih bahtem kee tamaray
is edde angoorowe cinte itiyobbiya yemeeten wak yeyyeeqen maybalaalaqal
elle yescessen innalaay kok iyyaanam weenik koh iyyaanam mageyan
akah iyyan innahaay, shaqbiyya elle tiksire sidiica ximmo daffeesehiiy
yen tohuk naharsitto rasi fidah fida mekelte axcihiiy sahdayti
baxih caddoluuy maaluuy maateriyal caddol abtemiiy kasaarat teetil
raqtemiiy nammey heele caddol baad ummattak axxeeruk inkih tanih
tan baad ummatta akah rammitta madqak awquk geytintam kee sidoc
haytoh baadak cuduud komishiin beeh yan madqa abinal assu duudume
waytu waytam Joon meeri yescesse.
Taham Eretrah ummatta rasi taagah mekelteh tan fida inkih kasaaratah
orbissem shaqbiyyah siyaasay afmakot akak yanih yani kinnimii
inkih tanih tan baad ummatta akah sumaaqittah tan numma kinnim
tamixxige.